خـــاطر لا يرد له طــــلب [الأرشيف] - منتديات مجالس الامارات

خســوف القمــر

02-09-2006, 05:18 AM

الســلام عليكم ورحمة الله و بركــاته ..
..
..
في محاولة مني أخرى ..
لتطوير نطاق كتابة القصة .. و بصورة مختلفه تمــاما عما حوته القصص ..
و أسلوب سردي منفرد بالطابع الخاص المطور ..
أدخلت تقنيات فنية حبكية جديدة في كتابة القصة ..
و هي الوسيلة الأكثر حداثة "المسنجر" فمن خلال هذه الوسيلة طرحت قصة ..
تختلف قليلا من حيث المضمون ..
إلا أنها تحوي العبرة المفيدة لكل معتبر ..
و تحمل أيضا "ستايل" غير المطروح على النطاق القصصي ..
آمل أن تنال القصة على الرضى العام و التــام ..
و القصة تحوي و تحكي عن الواقعيه مجرده من تدخل الخيال و هي قصة تحدث ألف مرة كل مرة ..
خاطر لا يرد طلبه ..قصة يسردها الخيال الواقعي ..
يتناول قضية مهمة في بشريتنا ...
أترك لكم حرية النقـــد ..
..
..
Never give out your password or credit card number in an instant message conversation.

حبيب قلبي الغالي أحبك says:
السلام عليكم .. شحالك يالخرتيت .. وينك أمس ؟؟
تبين الصدق حبيبتي .. أحبج حب مو عادي says:
و عليكم السلام .. هااا يالدبه .. شوو ويني .. موجود .. بس ما طولت .. دخلت النت جيكت الإيميلات و طلعت ..
حبيب قلبي الغالي أحبك says:
يعني .. قريت إيميلي .. صح ؟؟
تبين الصدق حبيبتي .. أحبج حب مو عادي says:
هيه قريته و ما عيبني
حبيب قلبي الغالي أحبك says:
ليش؟
تبين الصدق حبيبتي .. أحبج حب مو عادي says:
لانه مب من قلبج أدري
حبيب قلبي الغالي أحبك says:
لا و الله من قلبي
تبين الصدق حبيبتي .. أحبج حب مو عادي says:
لو من قلبج بتقولينها الحين
حبيب قلبي الغالي أحبك says:
لا أستحي الحين اقولها .. بس الإيميل يسد
تبين الصدق حبيبتي .. أحبج حب مو عادي says:
شفتي يوم اقولج مب من قلبج لو من قبلج جان قلتي لي اياها احبك يا عبد الله و طول عمري بحبك مثل ما قلتيها في الإيميل
حبيب قلبي الغالي أحبك says:
انزين .. أحبك
تبين الصدق حبيبتي .. أحبج حب مو عادي says:
من قلبج ..؟؟
حبيب قلبي الغالي أحبك says:
هيه من قلبي
تبين الصدق حبيبتي .. أحبج حب مو عادي says:
ليش تحبيني
حبيب قلبي الغالي أحبك says:
لانك فتحت لي قلبك و الشخص الوحيد اللي يفهمني و يحس بي و يحس باللي افكر فيه وايد اسباب تخليني احبك يا عبد الله و هذا الكلام مب من الحينه و بس لا بالعكس من اول يوم تعرفت عليك و رمست وياك بالرغم اني كنت جافه وياك بس حبيتك
تبين الصدق حبيبتي .. أحبج حب مو عادي says:
يعني مقتنعه بحبج لي؟
حبيب قلبي الغالي أحبك says:
اكييد و اتمناك اكثر من قبل و احبك اكثر من قبل و افكر فيك اكثر من قبل
تبين الصدق حبيبتي .. أحبج حب مو عادي says:
فدييييييييييييت روحج و الله الحين تأكدت اني حصلت اللي احبها و تحبني
حبيب قلبي الغالي أحبك says:
ليش انت تحبني ؟؟
تبين الصدق حبيبتي .. أحبج حب مو عادي says:
اسألي قلبي اللي نطق بهالكلمة قبل لساني ..
حبيب قلبي الغالي أحبك says:
حبيبي و الله .. عمري ما فكرت اني بحب بهذي الطريقة
تبين الصدق حبيبتي .. أحبج حب مو عادي says:
فديت قلبج الغالية تعرفين انج دخلتي في خاطري في كل كلمة تكتبينها في المنتدى في كل خاطرة في كل رد دايما احس انج غير عن كل البنات اللي في المنتدى مثقفة و واعية و مبدعه حتى في اسلوبج
حبيب قلبي الغالي أحبك says:
من ذووقك حتى انا كنت من ردودك احس انك تملك اكبر قلب و اللي احلم فيه حتى لو ماكنت من نصيبي كزوج انت حلمي اللي احلم فيه كحبيب و صديق يمكن يشل عني همي
تبين الصدق حبيبتي .. أحبج حب مو عادي says:
فديت روحج حبيبتي اذا انا ما شليت عنج همومج منو اللي بيشل عنج
تعرفين حبيبتي احس انج مخلوق ثاني مخلوقه غير عن كل البنات حتى في احساسج في كلامج في مشاعرج
حبيب قلبي الغالي أحبك says:
ربي لا يحرمني منك
تبين الصدق حبيبتي .. أحبج حب مو عادي says:
و لا يحرمني منج حبيبتي
حبيب قلبي الغالي أحبك says:
سمعت اغنية اليسا جوايا ليك
تبين الصدق حبيبتي .. أحبج حب مو عادي says:
ما اسمع حق الزلمات وااايد بس شو فيها
حبيب قلبي الغالي أحبك says:
روعة روعة روعة و الله حبيبي كل ما اسمعها اذكرك و اصيح
تبين الصدق حبيبتي .. أحبج حب مو عادي says:
لا لا لا لا حياتي كل و لا دموعج الغالية اللي اغلى من الذهب و كل معدن
حبيبتي انتي عمري و غلاي و روحي و أي شي يزعجج تراه يزعجني حبيبتي لا اتعبين عينج تراها معشوقة قلبي الغالية
حبيب قلبي الغالي أحبك says:
فديتك حبيبي و الله عمري ما تصورت في انسان قلبه مثل قلبك فديت قلبك
تبين الصدق حبيبتي .. أحبج حب مو عادي says:
اندوج خذي استقبلي هالأغنيه ..
تبين الصدق حبيبتي .. أحبج حب مو عادي says:

Open (Alt+P)
حبيب قلبي الغالي أحبك says:
شو الاغنية ؟؟
تبين الصدق حبيبتي .. أحبج حب مو عادي says:
ميحد حمد أحبك كثر الرمل
حبيب قلبي الغالي أحبك says:
تسلم حبيبي .. و انا احبك أكثر و أكثر
تبين الصدق حبيبتي .. أحبج حب مو عادي says:
فديت قلبج حبيبتي و الله ثم و الله انج تكبرين في قلبي و تحتلينه
حبيب قلبي الغالي أحبك says:
انت احتليت قلبي و صدري و عيني و كل حياتي و صرت بالنسبة لي كل شيء حتى الماضي نسيته لانك اصبحت لي كل شي احبك و الله احبك و الله احبك
تبين الصدق حبيبتي .. أحبج حب مو عادي says:
فديت قلبج حبيبتي ما ادري شو اقولج يكفيني اني اقول اني احبج لاني يوم احب احب بكل ما فيني
حبيب قلبي الغالي أحبك says:
يالله يا عبد الله لو قلبي يرمس جان خبرك باللي فيه لك
تبين الصدق حبيبتي .. أحبج حب مو عادي says:
حبيتي لو ما يخبرني ادريبه لانه قلبج
حبيب قلبي الغالي أحبك says:
تعرف عبد الله البارحه يالسه و يا اهلي و لا احس اني معاهم افكر فيك في كلامك اللي طرشته لي على الايميل حتى في مزحك في خواطرك اللي تكتبها في اشعارك اللي تكتبها حتى في ردودك معاي كلها احس انها تقول لي لقيتي يا سلامة اللي تحبينه لقيتي اللي يحبج و تحبينه
تبين الصدق حبيبتي .. أحبج حب مو عادي says:
فديتج كنت دوم المح لج من خواطري ومن ردودي كنت دايم اطريج في كل مكان لانج استويتي لي البيت و المكان
حبيب قلبي الغالي أحبك says:
يوم تكتب الاشعار احسك ترمس عني و تقدني في اشعارك في حروفك في كلامك
تبين الصدق حبيبتي .. أحبج حب مو عادي says:
و الله حبيبتي اني ما اقصدت غيرج و كل الاشعار فيج و اطريج فيها و اكلمج من خلالها لاني اعرف انج تفهمين الشي و اهو طاير
حبيب قلبي الغالي أحبك says:
ما ادري عبد الله ليش احس ان حياتي صارت حلوه و صارت روعه و ان الحياة حلوه و الأحلى وجودك فيها كل شي حلو حتى كلامك
تبين الصدق حبيبتي .. أحبج حب مو عادي says:
حبيبتي هذا قلبج الحلو و صدق عواطفه هو اللي خلاج تشوفين الدنيا حلوه
حبيب قلبي الغالي أحبك says:
أحبـــــــــــــــــــــــــــــــــــــــــــــــ ــــــــــــــــــــك
تبين الصدق حبيبتي .. أحبج حب مو عادي says:
فــــــــــــــــــــــــــــديت روووووووووووووووووووووووووووووووووووووحج حياتي ..
حبيب قلبي الغالي أحبك says:
و الله يا عبد الله اني احبك احبك احبك
تبين الصدق حبيبتي .. أحبج حب مو عادي says:
فديتج حبيبتي
حبيب قلبي الغالي أحبك says:
انت مشغول ؟؟
تبين الصدق حبيبتي .. أحبج حب مو عادي says:
لا ليش؟
حبيب قلبي الغالي أحبك says:
ليش ترد علي متأخر ؟؟
تبين الصدق حبيبتي .. أحبج حب مو عادي says:
لا اول ما يوصلني الكلام من عندج ارد عليج يمكن من المسنجر
حبيب قلبي الغالي أحبك says:
شو تسوي ؟؟
تبين الصدق حبيبتي .. أحبج حب مو عادي says:
أكتب قصيده فيج ..
حبيب قلبي الغالي أحبك says:
و الله ؟؟
تبين الصدق حبيبتي .. أحبج حب مو عادي says:
هي و الله .. تبين تقرينها ؟؟
حبيب قلبي الغالي أحبك says:
هيه ..
تبين الصدق حبيبتي .. أحبج حب مو عادي says:
أحبك و المحبه تحبك يا كامل الأوصاف
طيبه و قلب صادق و احساس ناس رهاف
عيونك منبع الطيبة و قلبك صوب الهداف
ما لوم قلبي تعلق براعي الرهاف
محسوب له معشوق من الف و آلاف
مالك بزينه و حسن زينه تحسف الحساف
حبيب قلبي الغالي أحبك says:
فديت روحك حياتي و الله انت اللي ملكتني و ملكت قلبي
تبين الصدق حبيبتي .. أحبج حب مو عادي says:
حياتي
حبيب قلبي الغالي أحبك says:
هلا
تبين الصدق حبيبتي .. أحبج حب مو عادي says:
ثواني
برب
حبيب قلبي الغالي أحبك says:
تيت
..........
غاب عبد الله .. يوم يومين .. ثلاثه اربعه خمسه .. سته سبعه ثمانيه .. كملت العشر أيام .. طرشت ايميلات .. عبد الله رد علي .. وينك ..
في المنتدى انت موجود .. ارسل لك رسالة خاصه ما ترد .. شو اللي صار .. عبد الله رد علي .. دخيلك حبيبي .. رد علي .. حبيتك من قلبي ..
,,,,,,,,,,,,,
حبيب قلبي الغالي أحبك says:
انت وييييييييييييييييييينك ؟؟
تبين الصدق حبيبتي .. أحبج حب مو عادي says:
سامحيني حبيبتي .. و الله مرت علي ظروف ..
حبيب قلبي الغالي أحبك says:
عيل كنت تدخل المنتدى
تبين الصدق حبيبتي .. أحبج حب مو عادي says:
هذا اخلي اخوي يدخل يجيك
حبيب قلبي الغالي أحبك says:
انزين ليش ما خليته يرد علي
تبين الصدق حبيبتي .. أحبج حب مو عادي says:
ما بغيته يراسلج
حبيب قلبي الغالي أحبك says:
شو كانت الظروف ؟؟
تبين الصدق حبيبتي .. أحبج حب مو عادي says:
شغل عندي في بوظبي .. و ما اقدر ادخل النت وايد
حبيب قلبي الغالي أحبك says:
ليش؟؟
تبين الصدق حبيبتي .. أحبج حب مو عادي says:
ما شي هناك نت ..اطلع من العين الساعه 6 الفجر و ما ارجع إلا الساعه 11 .. ارقد
حبيب قلبي الغالي أحبك says:
انزين على الاقل لو نص ساعه ادخل النت و سلم علي .. بكون اترياك
تبين الصدق حبيبتي .. أحبج حب مو عادي says:
ما اقدر حبيبتي اوصل تعبان ما اروم
حبيب قلبي الغالي أحبك says:
فديت روحك حبيبي انزين حتى لو اطرش ايميل على الاقل اسمع اخبارك اطمن قلبي عنك و الله طول هذي الفترة اللي ما شفتك فيها و لا كلمتك قلبي دوم يدق خايف عليك
تبين الصدق حبيبتي .. أحبج حب مو عادي says:
فديت قلبج حبيبتي
حبيب قلبي الغالي أحبك says:
حتى الأكل ما آكله و لا اشرب تعبت و الله تعبت ..
عبد الله أحبك و امووووت فيك
تبين الصدق حبيبتي .. أحبج حب مو عادي says:
فديتج قدري ظروفي و الله ما اقدر يعني تصوري اسير بوظبي من الساعه ست الفجر اوصل هناك الدوام الساعه 7 ونص و اشتغل لين الساعه 2 و عقب يعطوني بريك لين الساعه 4 و ارجع اكمل شغلي لين الساعه 9 و عقب ارد العين عشان ارقد
حبيب قلبي الغالي أحبك says:
انزين حبيبي طرش لي ايميل و خبرني عن صحتك ما بياخذ من وقتك وايد
تبين الصدق حبيبتي .. أحبج حب مو عادي says:
حبيبتي و الله ارجع هلكان و انا في الطريج الف مره بغيت ادعم ابا ارقد
حبيب قلبي الغالي أحبك says:
فديتك و الله انزين بطول حالك جذا ؟؟ يعني متى بخلص هالدوام الله ياخذه
تبين الصدق حبيبتي .. أحبج حب مو عادي says:
يمكن شهر يطول معاي او اكثر ما ادري
حبيب قلبي الغالي أحبك says:
خيييييييييبه .. حبيبي ما اروم بنتحر لو ابعد عنك ثانيه تقولي شهر
تبين الصدق حبيبتي .. أحبج حب مو عادي says:
انزين شو بإيدي حياتي عشان اسويه لج ؟؟
حبيب قلبي الغالي أحبك says:
حاول تدخل النت و الله بموت من شوقي عليك و الله الدموع ما تفارق عيوني مشتاقه لك
تبين الصدق حبيبتي .. أحبج حب مو عادي says:
انزين شو رايج
حبيب قلبي الغالي أحبك says:
في شو ؟؟
تبين الصدق حبيبتي .. أحبج حب مو عادي says:
ما اباج تزعلين و لا تفكرين فيني غلط
حبيب قلبي الغالي أحبك says:
في شوو؟؟
تبين الصدق حبيبتي .. أحبج حب مو عادي says:
شو رايج اعطيج رقم تلفوني و دقي عليه
حبيب قلبي الغالي أحبك says:
لا كله و لا التلفون
تبين الصدق حبيبتي .. أحبج حب مو عادي says:
حبيبتي .. بس فترة هالشغل و بعده لا تدقين و الله اشتاق لقلبج الطيب و سوالفج
حبيب قلبي الغالي أحبك says:
تلفون لا.. بعدين انا تلفوني مشترك ويا اختي يعني هي تشله وياها
تبين الصدق حبيبتي .. أحبج حب مو عادي says:
حياتي انزين سجلي اسمي اسم بنت و رمسيني بس ابا اسمع صوتج و اعيش احلى ايام عمري
حبيب قلبي الغالي أحبك says:
فديت قلبك و الله حبيبي اني ما اقدر و لا احب ارد لك طلب
تبين الصدق حبيبتي .. أحبج حب مو عادي says:
حياتي عشان خاطر حبنا اللي بنا صغير لا تموتينه و اهو صغيرخليه يكبر و يكبر لين ما يموت و نحن في القبر
حبيب قلبي الغالي أحبك says:
فديتك و الله أحبك و أحب قلبك و أحب كل شي فيك بس إلا التلفون لا و لا
تبين الصدق حبيبتي .. أحبج حب مو عادي says:
حبيبتي الله يخليج انتي مع الايام و مع فترات غيابي بيموت حبي و بتنسيني
حبيب قلبي الغالي أحبك says:
و الله لو اموت ما يموت حبك في صدري
تبين الصدق حبيبتي .. أحبج حب مو عادي says:
حبيبتي عشان خاطري .. لا تكسرين بخاطري
حبيب قلبي الغالي أحبك says:
و الله حبيبي مب حابه احطك بهالموقف لانك عزيز علي و احبك اكثر من روحي
تبين الصدق حبيبتي .. أحبج حب مو عادي says:
حبيبتي اسمعيني انتي لا تخافين من شي و انا عمري ما فكرت اضرج بشيء و انتي عارفه اني اموت فيج و احبج من قلب صادق سجلي اسمي باسم بنت ورمسيني على اني بنت و اختج شي طبيعي انها ما بتتصل على ربيعتج اللي هي انا
حبيب قلبي الغالي أحبك says:
حبيبي و الله خايفه من هالخطوة
تبين الصدق حبيبتي .. أحبج حب مو عادي says:
حبيبتي خلي ثقتج فيني لاني احبج و اكثر من هذا و ذاك انتي اغلى شيء في حياتي مستحيل اضرج لو بشعره لو بنسمة هو فديتج
حبيب قلبي الغالي أحبك says:
خايفه حياتي خايفه و الله ما اقدر اسوي جذا
تبين الصدق حبيبتي .. أحبج حب مو عادي says:
حبيبتي عشان خاطري و الله خاطري اعيش باقي عمري وياج و اعيش حلمي اللي حلمته طول عمري و احصل البنت اللي احبها و تحبني من قلب صادق
حبيب قلبي الغالي أحبك says:
ما ادري حبيبي ما ادري
تبين الصدق حبيبتي .. أحبج حب مو عادي says:
حبيبتي لا تترددين أحبج و تحبيني ليش الخوف و التردد؟؟
حبيب قلبي الغالي أحبك says:
ما عندي شي اقوله
تبين الصدق حبيبتي .. أحبج حب مو عادي says:
انزين شوفي حبيبتي .. انا الحين بطلع و هذا رقمي احتفظي فيه لين ما ارجع الاسبوع الياي و اذا ناسبج الموضوع رمسيني و اذا لا ما بجبرج بس تأكدي انج بتنسين الحب مع الأيام
حبيب قلبي الغالي أحبك says:
لالالالالا وين بتسير انا ما صدقت اشوفك حبيبي
تبين الصدق حبيبتي .. أحبج حب مو عادي says:
بسير ارقد حبيبتي باجر السبت و بسير بوظبي من الساعه 6..
حبيب قلبي الغالي أحبك says:
انزين اقعد رمسني خلني اعيش ويا حبيبي هالثواني اللي الاقيه فيها
تبين الصدق حبيبتي .. أحبج حب مو عادي says:
حبيبتي لو انتي صادقه وياي هذا رقمي و دقي عليه و خلينا نعيش ويا بعض على ارض الواقع و انتي عارفه عني كل شي و علاقتنا كملت شهر و نص يعني تعرفين صدقي من جذبي اذا كنت شاكه في حبي
حبيب قلبي الغالي أحبك says:
لا و الله أشك في كل الناس و لا اشك في ذرة منك أحبك بكل ما فيني
تبين الصدق حبيبتي .. أحبج حب مو عادي says:
يالله حبيبتي سامحيني ما اقدر اقعد على النت أكثر
حبيب قلبي الغالي أحبك says:
حبيبي اقعد اكثر و الله مشتاقه لك حبيبي
تبين الصدق حبيبتي .. أحبج حب مو عادي says:
ما عليه حبيبتي الجمعه اليايه برمسج اوكي حياتي و انتي بعد فكري فموضوع الرقم لانج بتوحشيني وااااااااااااايد وااااااااايد
حبيب قلبي الغالي أحبك says:
فديتك و الله اني مشاقه لك من الحين حتى و انت تكلمني انا مشتاقه لك أكثر و أكثر و أكثر لانك حبيبي الأول و الأخير احبك
تبين الصدق حبيبتي .. أحبج حب مو عادي says:
يالله حبيبتي تصبحين على خير
حبيب قلبي الغالي أحبك says:
و انت من اهل الخير حياتي و الله بشتاق لك و بتوحشني موووت فديت روحك ..
تبين الصدق حبيبتي .. أحبج حب مو عادي says:
و فكري في الرقم حياتي و الله بشتاق لج اكثر من ما تتصورين لاني احبج
باااااااااااااي
حبيب قلبي الغالي أحبك says:
باااااااااااااااااااااااااااااااااي..يا عمري
مرت الليله .. و في ايدي الرقم كتبته على ورقه .. و في بالي كتبت كل اللي قاله لي .. هذا حبيبي احبه موووت .. و اعشق حروفه و عيونه حتى همساته .. احبه .. و الله احبه ..
مرت الليله مثل الجبل و انزاح عني .. عرفت حبيبي ليش غايب عني .. و انحط علي جبل يديد .. الرقم .. اتصل عليه ..؟؟ لا .. شو اتصل .. بيعرف منو انا .. بيعرف عن اهلي .. بستوي من هالبنات اللي يرمسن شباب ..
لا .. بس هذا حبيبي .. وين اقدر اعيش عنه و اترياه اسبوع كامل بس عشان يكلمني هالنص ساعه و يسير يرتاح ..
حبيبي و الله ..
فتحت المنتدى .. قريت اشعاره .. خواطره .. مزاحه .. ضحكاته .. صحت .. اباااه مشتاقه له .. احبه .. امووت فيه .. فديته .. و الله كل اللي يباه اسويه له .. فديت قلبه الكبير .. عمري ما حصلت احد يحس فيني .. يحس بمشاعري .. بانسانيتي .. بابداعي .. هذا اللي احبه .. هذا اللي الله سخره لي .. هذا اللي انا عايشه عشانه .. عشان اتلاقى ويا اغلى الناس .. و اتلاقى ويا حبيبي ..
أحبك و الله أحبك ..
مرت الليلة .. نمت و في ايدي الرقم مكتوب في الورقة .. احضنها بكفوفي .. و الله يجمعني بحبيبي .. و احضنه بصدري .. و اعيش معاه احلى الليالي .. تحت القمر ليلة بدر .. و الهوى يلعب بشعري .. و يكتب فيني اشعار .. و يقول قلت فيج و قلت فيج ..
و الله أحبه ..
نشيت من رقادي اليوم الثاني .. الساعه ست !! ليش؟؟
شو اللي خلاني انش الساعه ست ؟
اكيد الله وعاني عشان ادق له و اسمع صوته الصبح .. وين رقمه .. حصلته قريب من قلبي .. شو اللي صاير ؟؟ اكيد هذا كله من الأقدرا .. و الله كاتب لي اني احب اللي ابيه و يباني ..
مسكت تلفوني .. و شوقي يسبقني يدق الأرقام .. ترددت اتصل في البداية .. استحيت ..
بس يوم اكتملن الأرقام في شاشتي .. حسيت بدقة قلبي .. حسيتها تقول لي .. ضغظة زر .. و تكونين يا سلامة بين همساته ..
اتصلت .. و صوتي يسابق حروفي ..
و عيوني بالدمع ذروفي ..
........
سلامه ::
.......
عبد الله ::
الووو ؟؟
سلامه ::
الووو .. عبد الله
عبد الله ::
هلا و الله ... هيه عبد الله .. من ؟؟
سلامه ::
سلامه ..
عبد الله ::
هلا و الله حبيبتي .. هلا الغاليه .. اخيرا ..
سلامه ::
انت شوو راقد ؟؟
عبد الله ::
هيه .. و الله زين يوم وعيتيني .. و لا جان تأخرت ..
سلامه ::
أسكر عنك ؟؟ عشان تسير تتسبح ؟؟
عبد الله ::
يلعن أبو الشغل .. شو اباااه يوم انتي متصله فديتج ..
سلامه ::
لالا .. سير الدوام برايك .. اكمك بعدين ..
عبد الله ::
فديتج و الله .. خلاص برمسج بعدين ..
سلامه ::
اوكي .. بااي
عبد الله ::
الله يحفظج فديتج و فديت هالصوت .. ما تعرفين شقد فرحتيني .. لانج دقيتي
سلامه ::
أوكي باااي حبيبي
عبد الله ::
فديتها طالعه من قلبج فديت قلبج ..
سلامه ::
بس عاد بتتأخر عن دوامك .. اكلمك بعدين ..
عبد الله ::
برايه .. يلعن ابو الدوام .. و الله ما تعرفين حياتي شقى صارت من بعد اتصالج ..
سلامه ::
عبد الله .. بعدين بكلمك .. باااي ..
عبد الله ::
شو حد عندج ؟؟
سلامه ::
لا .. بس بعدين بكلمك .. اوكيي ؟؟
عبد الله ::
اوكي .. يالله بااي حبيبتي ..

سكرت عنه .. و قلبي يرجف بين ضلوعي .. كلي ارجف .. جسمي يرتعد .. و صوتي يرجف .. حسيت اني اعرفه من زمان .. من زماااااان .. صوته دافي .. هادي .. و حنون ..
و احس اني مرتاحه اكثر يوم سمعت صوته .. حسيت ان قلبي اشتاق له اكثر .. و تعلق به اكثر .. كان ودي ارد و اتصل له عشان اسمع كلمة حبيبتي .. يوم يقولها ينقلب كياني .. احس ان الدنيا فاضية من الناس .. الورود في كل مكان .. و العالم حلو .. الله محلاته الحب ..
مسكت التلفون .. و بست السماعه .. يمكن توصل له حبي .. حضنت التلفون .. و حبيته بكل ما فيني .. يلست ادور في الغرفة .. و ادور .. و عيني للسمى .. و اسمع اغنية اليسا ..
"جوايا ليك احساس بيكبر كل يوم
العين تنام و القلب عمرو ما جالو نوم
من كثر شوقي و لهفتي شايل هموم
ارتحتلك احساس غريب بحسو لما ببصلك
و بحتلك لو حتى جنبي بحضن قلبي بحتلك
سلمتلك اغلى ما عندي حتى قلبي فتحتلك
عمري انا محتاجه منك كل نظرة حنية
روحي انا
الثانيه في بعادك بكم ملون سنة
قلبي انا
لما بتبعد عني مش هنا "
غنيت و غنيت .. لين صحت من شوقي له .. غنيت .. و صوتي مبحوح .. كله شوق و حنين لعبد الله ..
صحت صياح .. حست بدفى دموعي على خدودي .. و حسيت اني اول مره اصيح .. أول مره المس بكفوفي دموعي .. و أول مره اشوف نفسي اصيح .. شو اللي يصيحني .. كل شي عندي .. و هذي آخر امنيه في حياتي و تحققت لي .. حصلت اللي يحبني و احبه .. لازم افرح .. و اطير من الفرحه .. ليش اصيح ..
كان شعوري غريب .. و الأغرب من جذا اني كنت ادق الرقم و اكنسل .. ما اريد اكلمه .. شي بداخلي ما يخليني ادق له ..
فرت التلفون على الشبريه .. و يلست ادور في نص الغرفه .. و اغني .. و اغني .. و احس ان الغنى شفى عليل قلبي .. و حسيت ان الاغاني هي الوحيده اللي تشرح اللي في صدري .. وغــــــــــنيت .. و كل كلمة في الأغنيه .. احس انها تكلمني ..
صوت عبد الله ما غاب عن بالي .. احسه يهمس في اذني .. بالرغم من انه كان راقد .. إلا أني حبيت صوته الدافئ .. احبه بكل حالاته .. احبه و الله احبه .. و الله العالم وحده كم أحبه .. و كم اتمنى اسمع صوته ألف مره .. مب مره .. فديته ..
رجعت لمخدتي .. و ذرفت دمعتي .. و قلت ليتها تسقي عطشة إذا عطش .. و شهقت شهقتي .. و قلت ليتها تكون من منفسه .. و نامت عيوني ..
نشيت على صوت رنة التلفون .. كان رقمه .. خفت .. خوووف مب طبيعي .. حسيت ان قلبي بيوقف من كثر ما يدق .. في ايدي التلفون يصيح على نغمة الجسمي .. " والله ما يسوى اعيش الدنيا بدونك ..... " و انا اقووول :: هي و الله ما تسوى .. و ابوس شاشة التلفون الف مره .. و قلبي يرجف .. و يرجف .. كل ضلوعي .. ايدي ماسكة التلفون بكل حنان .. لانه المتصل حبيبي ..
سكت التلفون .. و صلتني رسالة "مسج" فتحتها .. كانت من صندوق البريد الصوتي .. دقيت على البريد الصوتي .. ذكرت رقمه .. و بعدين .. سمعـــت ..
" أحبك كثر رمل البيد و أكثر .. أحبك حب صادق يا هو ب بمنكر .. احبك حب يا قرة عيوني .. أحس القلب من كثرة تفجر"
سمعت المقطع .. و عيني ذرفت دمع الفرح .. و دمع الحزن .. و دموووع وايده .. ما عرفت اسبابها .. إلا إني عرفت إنها عشانه .. عشان عبد الله حبيبي .. قلبي .. روحي .. عمري .. كل شيء ..
دقايق .. و ثواني .. عديتهن على بقلبي .. و اشوف ايدي .. بدون ادراكي ... اتصل عليه .. شوقي يجبرني غصب .. و يجرني جر .. دون ما اعرف الاسباب ..
سلامه ::
الوووه
عبد الله ::
هلا حياتي .. شحالج ..
سلامه ::
بخير .. انت شحالك ؟؟
عبد الله ::
بخير بسماع صوتج .. شو كنتي نايمه ؟؟
سلامه ::
لا ..
عبد الله ::
عيل ليش ما رديتي علي ؟؟
سلامه ::
ما كنت عند التلفون ..
عبد الله ::
اهاا .. و شخبارج بعد ؟؟
سلامه ::
ماشي الحمد لله .. انت وين ؟؟
عبد الله ::
في بوظبي .. في الدوام ..
سلامه ::
في الدوام ؟!؟ عيل اسمع اغاني و ضحك ؟!!
حسيت انه ارتبك عبد الله ::
شوو .. لا .. هذا ربيعي في الدوام يسمع النغمات في تلفونه ..
سلامه ::
تلفون في الدوام !؟؟! جي انت مب في الجيش تشتغل ؟؟
اختبص عبد الله ::
هيه .. بس نحن الحين في الكافتيريا مال الدوام ..
سلامه ::
هيـــه .. عندكم بريك الحين ..
عبد الله ::
هيه ..
سلامه ::
ما تقولي البريك مالكم يبدأ الساعه 2 ؟؟ الحين الساعه 12 ؟!؟!
عبد الله ::
ما ادري .. اليوم بس عطونا بريك من الساعه 11و نص ..
سلامه ::
هيــه ..
عبد الله ::
متى نشيتي ؟؟
سلامه ::
على صوت رنة التلفون يوم انت اتدقلي ..
عبد الله ::
عيل ازعجتج ؟؟
سلامه ::
لالا
عبد الله ::
فديتج و الله ..
سلامه ::
ههه ..
عبد الله ::
و فديت هالضحكة
سلامه ::
بس عاااد
عبد الله ::
ان شاء الله ..
سلامه ::
لين متى هالبريك ؟؟
عبد الله ::
لين الساعه 2
سلامه ::
اهاا..
عبد الله ::
بعدج خايفه مني ؟؟
سلامه ::
لا ..
عبد الله ::
فديتج و الله ..
سلامه ::
بس شوي مستحيه منك ..
عبد الله ::
مع الايام .. بتتعودين علي ..
سلامه ::
ان شاء الله ..
كنت اسمع ضحكات .. يوم ارمس .. و اسمع حد يقول :: "اصصص" و حد يضرب حد .. و حد يضحك .. و حد يقول "اووء اوووء بو سعيد حالك فريد" ... منو هذيلا .. وليش يصارخون .. بصراحه انزعجت .. و حسيتهم يطرون عبد الله او شيء جذا ..
سلامه ::
خلاص اكلمك بعدين عبد الله ..
عبد الله ::
ليش ؟؟
سلامه ::
بس اكلمك بعدين ..
عبد الله ::
خلاص عراحتج ..
سلامه ::
اوكي بااي ..
عبد الله ::
انزين متى اقدر اكلمج ؟؟
سلامه ::
انت لا تتصل .. انا بدق عليك يوم بقدر ..
عبد الله ::
خلاص حبيبتي ..
سلامه ::
اوكي حياتي ..
عبد الله ::
فديتج و الله ..
سلامه ::
عبد الله ؟!
عبد الله ::
هلا ؟..
سلامه ::
بشتاق لك ..
عبد الله ::
الله العالم بحالي عيل في غياب صوتج حياتي ..
سلامه ::
باااي ..
عبد الله ::
بااي
سكرت عنه .. و قلبي يقول لي لييييييش .. ليش سكرتي عنه .. حسسني اني ارتكبت ذنب .. او غلطت على حبيبي .. اشتقت له لمجرد اني سكرت عنه .. اشتقت لصوته .. اشتقت له الف مره .. حطيت التلفون على المخدة .. و شغلت المسجل .. و عدت اغنية .. "جوايا ليك" و غنيت .. و غنيت .. و حسيت ان روحي بتطلع مع الاغنيه من الشوق لعبد الله .. كان شعوري فوق تصويري .. كنت احس ان الدنيا كبير .. لكن يوم عرفت عبد الله .. حسيتها صغرت .. اكثر و اكثر .. حسيتها بين ايدين عبد الله ..
دخلت الحمام .. و صوتي ما فارق الاغنيه .. و عيني تدمع فرح و مره حزن .. حزينه لاني بعيده عن عبد الله .. و فرحانه لاني اقرب له من قبل ..
غنيت و غنيت ..
طلعت من الحمام .. و غيرت ملابسي .. و طلعت برع الغرفه .. يلست مع اخواني .. خواتي .. بين امي و ابوي .. يتكلمون .. يمزحون .. و انا افكاري مع عبد الله .. ياترى شو قاعد يسوي .. الجريده بين ايدي .. و بعدني في نفس الصفحة .. اقرى كلمة و اسرح بعيد بعيد بعيد عن الواقع .. و ارجع اكمل اقرى .. و كل كلمة فيها حرف من حروف اسمه .. اسرح في الحرف .. و تتخيلي الكلمة كأنها مكتوب عبد الله .. كل كلمة .. بدايتها حرف الألف و الحاء .. تصير في عيني حب .. أحبج .. أحبك ..
غابت عني فكاهتي اللي كانوا متعودين عليها .. الكل يحاول يمزح وياي .. و يضحك وياي .. لكن وين ابتسامتي .. غابت .. غـــــــــــــــــابت .. مع صوت عبد الله الغايب عني ..
قالوا حطوا الغدى ..
قلت ما اشتهي .. دخلت غرفتي مره ثانيه .. عشان اغني .. و انسى عذابي لو دقايق مع الاغنيه ..
خطر لي افتح المنتدى ..
حاولت اشارك في المنتدى الترفيهي نفس قبل .. ما قدرت .. يلست ساعه و ساعتين .. احاول اكتب رد .. مب قادره ..
ربيعاتي يطرشون لي رسايل خاصه .. اللي يسألني ليش ما اشارك في لعبة السجن .. لاني مسجونه .. و اللي يقول .. فروا علي الطماطه و لازم ارد عليهم ..
ما رديت .. و لا سألت عن حد .. اقرى و بس ..
و اطلع و ادخل على كل مواضيع مشارك فيها عبد الله .. خواطر .. قصايد .. مواضيع يكتب فيها .. مواضيع يطرحها ..
الإدارة .. تباني ضروري .. لاني مشرفة مميزة .. و منزلين تصويت انتخابات لترشيح مشرفين .. لكني ما شاركت .. وايد اشياء صارت .. في خلال هالساعات اللي انا قاعده فيها على الكرسي و الكمبيوتر .. من دون ما ازيد حرف واحد ..
مسؤول المنتدى دخل المسنجر .. و كلمني .. بس ما رديت عليه .. و ترك لي مسج على المسنجر .. يقولي فيها ::
" اختي الفجر البعيد .. الإدارة في انتظارج .. لا تتأخرين .. هناك مواضيع محتاجه رأييج .. و في ذانيه محتاجه ردج كمشرفة .. اتمنى تمرين عليهم .. و شكرا "
ما رديت عليه .. ما ادري شو اللي صاير فيني .. احساس فيني غريب .. ما احس بطعم الأشياء .. و لا حلاوتها .. كل شي صار عبد الله .. كل شي .. حتى الألوان .. الحروف .. الأصوات ..
اسرح في اشعاره .. في قصايده .. في خواطره .. في ردوده لي ..
وما نشيت من غيبوبة الصمت اللي دامت ساعات .. لين ما سمعت صوت التلفون يرن
"والله مايسوى اعيش هالدنيا بدونك"
قفز قلبي .. قلت عبد الله .. قلت عبد الله .. ركضت على صوب التلفون ..
حصلتها ربيعتي من المنتدى ..
كلمتها .. كان ردي ناشف .. سألتني اذا كنت مريضة او شي .. قلت لا .. قالت كلهم يسألون عني .. و ما يشوفوني ارد عليهم .. شو السالفه ,, قلت لها .. يالسه ادرس و مودره النت شغال ..
يوم شافت اني جذابه .. لانها تابعت تنقلاتي على المنتدى .. من خلال المتواجدين .. و قالت لي .. اووكي .. برايج .. سكرت عني .. و احساسي يقول .. شو اللي سويته الحين .. هذي ربيعتي .. وماكان المفروض اقابها بهالويه ..
شو اللي قاعد يصير لي ..
هدوووء .. صمت .. حزن .. اذن العصر .. المغرب .. و انا بعدني على يلستي .. ما حركني شي..
تلفوني في ايدي .. و متردده ادق له و لا لا .. يمكن مشغول .. يمكن يكون في الدوام الحين ..
دقوا الباب علي ..
بطلت .. كانت امي .. سألتني .. شوفيج .. شو مزعلنج .. ما تغديتي .. و لا تقهويتي و يا ابوج .. و لا كلتي شي .. مريضة شوو ؟؟
لا .. مب مريضة .. عادي ما اشتهي .. احس بالشبع ..
لا يكون مسخنه و لاشي ؟؟
لا لا .. بس مالي خاطر آكل ..
انزين .. صليتي ؟؟
هيــه ..
طلعت امي .. و لا احس اني اكذب .. كل شي عادي ..
طلعت من الغرفة ورا امي ..
و نسيت حتى اغير ملابسي .. اللي لابسته ملابس النوم .. ما يصلح اطلع بهم ..
اختي خلود .. سالتني .. انتي شو جي لابسه .. غيري ملابسج .. بتسيرين ويانا السوق و لا لا ؟؟
رغم اني احب اسير الاسواق بشكل جنوني .. و أي فرصه ما افوتها على عمري .. إلا اني حسيت بعدم الحماس اني اسير .. قلت لها ما بسير ..
غريبه .. مب من عوايدج .. احيدج تموتين على الاسواق ..
مالي خاطر ..
رديت الغرفة .. من بعد ما انتبهت لملابسي .. رديت على شبريتي .. و انخشيت في اللحاف .. و يلست اسمع الاغنيه اللي حطها لي في البريد الصوتي ..
..
..
مرت الأيام .. و كملت علاقتنا اسبوعين .. و ثلاثه .. و حبيته اكثر و اكثر و اكثر .. قلبي صار ملكه .. حياتي كلها صارت عشانه .. صرت اعرف اكتب شعر من حبي له .. علمني الحب على اصوله .. من بعد ما كنت اعرف الحب من خلال الاغاني و الاشعار و القصص الرومنسية ..
تعلمت الحب .. و عرفت دروبه .. حسيت الروح ردت لي .. حسيت اني عايشه اخيرا .. و حياتي صارت ملونه ..
خلص شغله في بو ظبي .. و رد العين .. و صار لي اربع وعشيرن ساعه .. متى ما اريد اكلمه .. اتصل عليه .. في اليوم كنت اتصل فوق العشر مرات .. بس عشان اسمع صوته .. كنت احيانا اتحجج اني بطلع السوق .. استأذنه .. و كنت احيانا .. اسوي عمري مريضه .. و ادق له .. عشان اسمع صوته .. و على هالمنوال اتحجج باي حجه عشان اسمع صوته بسبب و بدون سبب ..
كان يدلعني بكلامه .. يوم يضحك معاي .. احس ان الدنيا تضحك معاي .. كان اسبوعين و لا اروع منهم .. حسسني بالفرح .. بالسعادة الحقيقية .. بالحب .. بطعم الحياة .. كنت مثل الياهل اتصرف .. كل شيء يحلى بعيوني بوجوده .. و كل شيء يديد بالنسبة لي ..
و عى ضميري في يوم من الأيام .. و قال لازم اوقف اتصالاتي .. و نرجع للمسنجر .. بما انه خلاص .. خلص دوامه .. و في نص كلامنــا ..
سلامه ::
عبادي حياتي ..
عبد الله ::
هلا عمري ..
سلامه ::
الحين انت خلاص ما ادوام في بوظبي صح ؟؟
عبد الله ::
هيه .. خلاص ما اداوم هنــاك ..
سلامه ::
انزين .. عيل حياتي .. لازم ما نكمل نرمس على التلفون ..
عبد الله ::
ليش ؟؟
سلامه ::
لانك تقدر تدخل المسنجر .. بنتلاقى على المسنجر .. و نسولف هناك ..
عبد الله ::
تبين تحرميني .. من هالصوت ؟؟
سلامه ::
فديتك و الله حياتي .. بس تعرف اني اخاف حد يسمعني او يزخني ..
عبد الله ::
حبيبتي .. تعودت على صوتج .. صرت ما اقدر استغني عنه ..
سلامه ::
انزين ما عليه .. حبيبي .. على الاقل .. يصير كلامنا اقل من قبل .. لاني ما اريد اسولف اكثر.. و ما نرمس على التلفون إلا للأشياء الضرورية ..
عبد الله ::
خلاص على راحتج .. مع اني احب صوتج .. بس خلاص .. على راحتج ..
حسيت .. اني ندمت .. حسيت اني كسرت بخاطر حبيبي .. شو اللي سويته ..
في احد يسوي جذا في حبيبه ؟؟ و الله اني هبلا ..
حاولت ارقع على كلامي .. لاني حسيت اني زعلته ..
مر اليوم .. و اليوم الثاني .. قررت بالقرار اللي قلته له .. وما اتصلت .. ترييته يدخل المسنجر كعادته .. من الساعه 10 الفليل .. لين الساعه 4 الفجر ..
اتريت و صلت الساعه 1 .. طرشت مسج
"وينك حياتي .. ليش ما تدخل النت " ..
ترييت اكثر و اكثر .. و قلبي يقولي انه زعلان علي ..
و انه خاطره مكسور و السبه انا .. حسيت ان قلبي يعورني ..
ما رد على المسج .. حاولت اثقل قد ما اقدر .. حاولت و حاولت ..فجأة ..
شفت نك نيمه في المنتدى ؟!؟!؟
الله !! شو يسوي هذا هنا ؟؟ ليش ما يدخل المسنجر ..
شو فيه .. تريييته يدخل ..
طرشت له رساله خاصه ..
رغم ان الرسايل مراقبه ..
إلا اني ما قدرت اصبر عنه .. ما رد علي .. طرشت مسج له .ز ما رد ..
دقيت له تلفون .. ما يرد ..
صحت .. و صحت .. و صحت .. قلت زعل مني .. انا السبب .. لاني حيوانه .. و لا اعرف احب مثل الناس .. في وحده تحب و تقول حق حبيبها نرمس على المسنجر .. و يلست اصيح ..
حسيت اني خلاص بموووت .. حسيت انه كرهني .. لاني صدق استاهل اني انكره لانه اللي قلته ما تقوله و حده تحب من قلبها .. يلست احسب الف حسبه .. شو اللي صار .. و ليش قلت .. و شو بقول يوم بيرد علي .. حسيت الدنيا تلف فيني .. و الف سوال و سوال يطرون على بالي ..
دقيت مره ثانيه .. و ثالثه و رابعه ..
مارد علي ..
مرت الليله علي يبل على صدري .. حسيت اني اختنق .. حسيت ان قلبي بينفجر شوق لصوته .. و الله عمري ما حسيت هالإحساس .. كأن آخر يوم في حياتي هو هاليوم ..
حسيت بالهم .. التعب .. الضيق .. و الشوووووق ..
..
رغم اني رقدت الساعه 4 .. إلا إني نشيت الساعه 8 .. طرشت له مسج اعتذر .. و مسج ثاني اصبح عليه .. و مسج ثاني اشتقت له .. و مسج ثاني .. اصيح فيه .. ومسج ثاني احبه موت .. و مسج ثالث و رابع و عاشر ..
و لا رد علي بمسج واااحد .. !!
صحت من الخاطر .. و الله قلبي وقف .. و عمري ما توقعت اني بنحط ويا حبيبي في هالموقف .. يلست اصيح .. و حسيت ان روحي بتطلع من الهم و الكدر .. حسيت اني خلاص لازم انتحر .. لازم .. لازم ..
دقيت له .. ما رد .. سجلت صوتي في البريد الصوتي .. ما اعرف من وين ياتني هالقوة .. بس سجلتها .. و كلمته .. و قلت له كل اللي في خاطري .. و صحت ..
و مع ذلك .. ما رد علي ..
!!!!!!!!
شو اسوي ..
بمووووووووووت ..
بموووووووووووووووت ..
الشوق ذابحني من كل صوووب ..
يلست على شبريتي .. اصيح .. و اصيح ..
لين الساعه 11 .. و اللي سكتني .. صوت رنة التلفون ..
حسيت ان روحي ردت فيني .. مره وحده .. و قلبي قفز من مكانه .. و قلبي بيطير .. بيطير .. حبيبي المتصل .. عبد الله .. حبيبي المتصل .. فديته .. و الله انه هوو ..
رديت على التلفون ..
صوته كان هادي .. حسيت انه يتكلم وماله خاطر ..
و انا بعد احساسي بالذنب و الشوق و العتب .. خلاني اتكلم من دون خاطر .. بس شوقي كان واااضح بشكل مب طبيعي ..
كل اللي قالي .. ادخل النت .. برمسج ..
قلت اوكي ..

صدق المشاعر و صلنك .. يا هل قول شاعر تكذبه ؟؟ says:
هلا حبيبتي |.. شحالج
حبيبي .. لو تغيب .. لو تبعد بعيد .. أحبك says:
بخير .. انت شحالك حبيبي ..
صدق المشاعر و صلنك .. يا هل قول شاعر تكذبه ؟؟ says:
بخير .. شخبارج
حبيبي .. لو تغيب .. لو تبعد بعيد .. أحبك says:
الحمد لله بخير
الحمد لله.. صدق المشاعر و صلنك .. يا هل قول شاعر تكذبه ؟؟ says:
شو مسويه بعد؟؟
حبيبي .. لو تغيب .. لو تبعد بعيد .. أحبك says:
ما شي بخير .. بس مشتاقه لك .. و بموت من االشوووووق و قلبي يعورني في غيابك .. و بنتحر لو تغيب ثواني زياده عني
صدق المشاعر و صلنك .. يا هل قول شاعر تكذبه ؟؟ says:
فديتج انتي ما تبين ترمسيني .. بعد شوو
حبيبي .. لو تغيب .. لو تبعد بعيد .. أحبك says:
انا ما قلت ما ابا ارمسك .. انا قلت ما اريد اكمل على التلفون .. ابا ارد وياك شرات قبل على النت و بس دون التلفون و التلفون بس حث الشيء الضروري
صدق المشاعر و صلنك .. يا هل قول شاعر تكذبه ؟؟ says:
خلاص انزين .. هذا نحن على المسنجر جذا اوكي؟؟
حبيبي .. لو تغيب .. لو تبعد بعيد .. أحبك says:
هيــه .. وين كنت امس ..؟؟ ليش ما دخلت المسنجر ؟؟ و ليش ما رديت على تلفوني ؟؟ و لا على المسج؟؟ لا مال البارحه و لا اللي طرشتهن الصبح ؟؟
صدق المشاعر و صلنك .. يا هل قول شاعر تكذبه ؟؟ says:
ما بغيت ارمسج على التلفون بناءا على اوامرج حبيبتي .. و النت البارحه مقطوع ..
حبيبي .. لو تغيب .. لو تبعد بعيد .. أحبك says:
مقطوووع هاا؟؟ عيل كيف يلست ترد على الاعضاء؟؟
صدق المشاعر و صلنك .. يا هل قول شاعر تكذبه ؟؟ says:
خليت ربيعي "رياح الشمال" يرد عليهم
حبيبي .. لو تغيب .. لو تبعد بعيد .. أحبك says:
و الاشعار بعد هو يكتبهم ؟؟
صدق المشاعر و صلنك .. يا هل قول شاعر تكذبه ؟؟ says:
هيه دقيت له و قلت له شوو يرد عليهم
حبيبي .. لو تغيب .. لو تبعد بعيد .. أحبك says:
اهاا
صدق المشاعر و صلنك .. يا هل قول شاعر تكذبه ؟؟ says:
و بعد شي سؤال يا حياتي تبين تعرفينه ؟؟
حبيبي .. لو تغيب .. لو تبعد بعيد .. أحبك says:
هيه .. اشتقت لي و لا لا ؟؟
صدق المشاعر و صلنك .. يا هل قول شاعر تكذبه ؟؟ says:
اندوج قلبي .. تأكدي بنفسج ..
حبيبي .. لو تغيب .. لو تبعد بعيد .. أحبك says:
فديت قلبك حبيبي .. و الله مشتاقه لك مووووووووووووت
صدق المشاعر و صلنك .. يا هل قول شاعر تكذبه ؟؟ says:
فديت روحج ..و الله انا بعد مشتاااق لج اكثر و اكثر .. و كل مره ابا اتصل بس اقول لا ما بيعيبها ..
حبيبي .. لو تغيب .. لو تبعد بعيد .. أحبك says:
فديتك و الله حبيبي .. البارحه تميت اصيح .. و اصيح .. قلت اكيد زعلت علي .. لاني قلت لك ما ابا ارمسك على التلفون .. و الله حسيت اني كسرت بخاطرك ..
صدق المشاعر و صلنك .. يا هل قول شاعر تكذبه ؟؟ says:
فديييييييت روحج و الله .. تعرفين اني ما ادانيج تصيحين و تزعلين عمرج .. و عن خاطري عله يتكسر تكسير .. و لا يهز لج شعره فديتج
حبيبي .. لو تغيب .. لو تبعد بعيد .. أحبك says:
لا و الله كله عاد و لا خاطرك فديتك .. و الله احبك ..
صدق المشاعر و صلنك .. يا هل قول شاعر تكذبه ؟؟ says:
قريتي آخر قصيده كتبتها ؟؟
حبيبي .. لو تغيب .. لو تبعد بعيد .. أحبك says:
هيه .. روعه و الله روعه ..
صدق المشاعر و صلنك .. يا هل قول شاعر تكذبه ؟؟ says:
طبعا فيج هذي
حبيبي .. لو تغيب .. لو تبعد بعيد .. أحبك says:
فديتك و الله
صدق المشاعر و صلنك .. يا هل قول شاعر تكذبه ؟؟ says:
يعل روحي فداااج .. و افدى هالصوت ..
حبيبي .. لو تغيب .. لو تبعد بعيد .. أحبك says:
فديتك..
عشنا ساعات و ساعات .. و نحن نرمس و نسولف و نضحك .. و نعوض ليلة أمس .. و غيابنا .. عشت ساعات و لا اروع .. حسيت ان روحي ردت لي من ثاني .. عمري ردت الوانه .. و الضحكة اللي فارقتني .. ردت لي .. و كل شيء رد مثل اول ..
صدق المشاعر و صلنك .. يا هل قول شاعر تكذبه ؟؟ says:
حبيبي .. طلبتج ..
حبيبي .. لو تغيب .. لو تبعد بعيد .. أحبك says:
آمر حبيبي .. و الله لو تبى عيوني .. اعطيك ..
صدق المشاعر و صلنك .. يا هل قول شاعر تكذبه ؟؟ says:
فديت عيونج ..
حبيبي .. لو تغيب .. لو تبعد بعيد .. أحبك says:
آمر حبيبي ؟؟
صدق المشاعر و صلنك .. يا هل قول شاعر تكذبه ؟؟ says:
حبيبتي .. ابا اشووف شكلج
حبيبي .. لو تغيب .. لو تبعد بعيد .. أحبك says:
ما يحتاي .. (:
صدق المشاعر و صلنك .. يا هل قول شاعر تكذبه ؟؟ says:
فديتج .. دخيلج .. ابا اشوفج .. و الله خاطري اشوفج..
حبيبي .. لو تغيب .. لو تبعد بعيد .. أحبك says:
فديتك و الله .. مب لازم ؟؟
صدق المشاعر و صلنك .. يا هل قول شاعر تكذبه ؟؟ says:
حياتي .. دخيل والديج .. ابا اشوفج ..؟؟ بس راويني صورتج على السريع ..
حبيبي .. لو تغيب .. لو تبعد بعيد .. أحبك says:
مب لازم حبيبي
صدق المشاعر و صلنك .. يا هل قول شاعر تكذبه ؟؟ says:
على السريع .. و الله كل يوم اتخيل شكلج خاطري اتم على شكل واحد اتذكره فيج
حبيبي .. لو تغيب .. لو تبعد بعيد .. أحبك says:
فديتك و الله .. انزين انت الأول ؟؟
صدق المشاعر و صلنك .. يا هل قول شاعر تكذبه ؟؟ says:
اوكي .. صبري شوي ..
حبيبي .. لو تغيب .. لو تبعد بعيد .. أحبك says:
اوكي ..
صدق المشاعر و صلنك .. يا هل قول شاعر تكذبه ؟؟ says:
هاااه شووو الراااي ؟؟
حبيبي .. لو تغيب .. لو تبعد بعيد .. أحبك says:
انت هذا ؟؟
صدق المشاعر و صلنك .. يا هل قول شاعر تكذبه ؟؟ says:
هيه
حبيبي .. لو تغيب .. لو تبعد بعيد .. أحبك says:
احلف؟؟
صدق المشاعر و صلنك .. يا هل قول شاعر تكذبه ؟؟ says:
و الله .. ليش ؟؟
حبيبي .. لو تغيب .. لو تبعد بعيد .. أحبك says:
فدييييييييييت هالويه محلاته .. و لا اللحيه .. اميييييييييه محلاته .. فديتك و الله ..
صدق المشاعر و صلنك .. يا هل قول شاعر تكذبه ؟؟ says:
احم احم .. احرجتيني ..
حبيبي .. لو تغيب .. لو تبعد بعيد .. أحبك says:
هههههههههههههههه
صدق المشاعر و صلنك .. يا هل قول شاعر تكذبه ؟؟ says:
يالله عاااد .. راوينا حلاتج
حبيبي .. لو تغيب .. لو تبعد بعيد .. أحبك says:
ما اريد .. قطعتني ..(:
صدق المشاعر و صلنك .. يا هل قول شاعر تكذبه ؟؟ says:
يالله عاااااد .. فديتج و الله عالسريع ..
حبيبي .. لو تغيب .. لو تبعد بعيد .. أحبك says:
انزين .. بس عيوني .. مب لازم كل ويهي ..
صدق المشاعر و صلنك .. يا هل قول شاعر تكذبه ؟؟ says:
فديت عيونج حياتي .. بس ما يسدني .. خاطري اشوف ويهج ..
حبيبي .. لو تغيب .. لو تبعد بعيد .. أحبك says:
هااا شوو رايك
صدق المشاعر و صلنك .. يا هل قول شاعر تكذبه ؟؟ says:
وين ما شفت .. مسرعج غيرتيها .. رديها
حبيبي .. لو تغيب .. لو تبعد بعيد .. أحبك says:
هااه ..
صدق المشاعر و صلنك .. يا هل قول شاعر تكذبه ؟؟ says:
فديييييييييت هالويه .. و الله .. فديتج
حبيبي .. لو تغيب .. لو تبعد بعيد .. أحبك says:
هااه حلوه ؟!؟
صدق المشاعر و صلنك .. يا هل قول شاعر تكذبه ؟؟ says:
فديتج و الله .. حلوه وبس .. إلا قمر .. فديت هالويه .. و الله انج تقطعين كل مغنيه و كل مطربه و كل ممثله .. و اله انج الجمال كله
حبيبي .. لو تغيب .. لو تبعد بعيد .. أحبك says:
Thank u ..
صدق المشاعر و صلنك .. يا هل قول شاعر تكذبه ؟؟ says:
فديت هالويه ..
حبيبي .. لو تغيب .. لو تبعد بعيد .. أحبك says:
فديتك .. بس عااد .. بصدق عمري عقب .. (:
صدق المشاعر و صلنك .. يا هل قول شاعر تكذبه ؟؟ says:
صدقي فديتج .. و الله انج قمر ..
حبيبي .. لو تغيب .. لو تبعد بعيد .. أحبك says:
فديتك ..
مرت الأيـــام .. و ودرنا المسنجر .. و ردينا على التلفون .. لاني ذبت فيه ..
كان روعه .. حلوو .. بشو اوصف لكم ايااه ..
يشبه عيضه .. يشبه سلمان حميد .. يشبه عبدالرحمن الزيني .. ما ادري كييف ..
جذى اشوف فيه ويوه الخلق كلهم .. كل ويه احس انه يشبهه ..
حبيته اكثر .. و اكثر .. اتصالاته .. كثرت .. و اتصالاتي زادت .. صرت كل ثانيه اتصل عليه .. ابا اسمع صوته .. ما اشبع من صوته .. حبيته بكل قوة .. و بكل ما فيني .. ما سدتني النظرة اللي شفته فيها على المسنجر .. طلبت صورته .. حطيتها في تلفوني .. و كل يوم اشوفه .. كل ما امسي .. ابوس الصورة .. و كل ما اصبح .. ابوس الصورة .. كل ما امسك تلفوني .. افتح على الاستوديو عشان اشوف صورته و ابوسه ..
حبيته .. اكــــــــــــــــــــــثر من قبل مليون مره ..
يتني الجرأة .. اني اواعده في السوق و يا أهلي .. بس عشان اشوف شكله على الطبيعه ..
و شفته و شافني ..
كان الود ودي .. اطير .. و احضنه .. و ابوسه على خده ..
حبيته الف مره .. الف مره .. الف مره ..
اتطورت علاقتنــا .. و صرت اطلع معاه .. كل ليله .. كل ليله ..
بس عشان اشوف ويهه .. و اعيش معاه ساعه .. و اقول له احبك ..
كل اللي في بيتنا .. ما حسوا علي .. لانهم اصلا ما يدرون بي .. حياتي .. صارت صامته وياهم .. و محد حس بي ..
استمرت علاقتي و ياه .. سنة كــاملة ..
اعطيته كل شيء .. كل اللي .. يبا .. حتى .. عذريتي ..
لاني احبه .. امووت عليه .. و كان يبادلني بنفس الشعور .. يموت فيني .. يحبني ..
كل يوم عن يوم اشتاق له اكثر و اكثر و اكثر .. كل ساعه .. كل لحظة .. اباا اشوفه .. ابا اسمع صوته ..
المنتدى .. المنتدى .. نزلني من اشرافي ..
لاني ما صرت ادخل النت .. صرت كل ليلة .. اكمل ساعات اسولف وياه ..
ما امل .. لاني احبه .. و اعشقه ..
..
..
مره و انا كنت وياه طالعه .. و مرت الساعه المحدده بيني و بينه ..
من الساعه 2 إلى الساعه 3 ..
طلب اني ايلس معاه اكثر .. لانه مشتاق لي .. و ما يقدر ينزلني .. و انا بعد .
. كل ما تمر هالساعه .. احس ان عمري يضيع يوم انزل عنه .. و خاطري ايلس وياه الف ساعه .. و ساعه .. و العمر كله بعد ..
رفضت .. خفت اني اتأخر على البيت .. قلت له
:: اخاف اهلي يوعون .. او شي يصير .. وما يحصلوني ..
عبد الله ::
يعني الحين .. شهور و انتي تظهرين و ياي ما حسوا عليج .. تبينهم من هالساعه يحسون عليج ..
سلامه ::
ما فيني اغامر ..
عبد الله ::
فديتج .. بس هالساعه .. و الله مشتاق لج ..
سلامه ::
فديتك .. و الله اخاف يصير شي ..
عبد الله ::
يالله عاااد .. خلي عنج الخوف ..
سلامه ::
حبيبي ردني البيت .. اخاف اهلي يحسون علي ..
عبد الله ::
منو بيحس عليج ..؟؟
سلامه ::
يمكن امي .. و لا اختي خلود .. و لا شيخاني ..
عبد الله ::
ما عليج انتي .. انزين بس هالساعه .. بسولف وياج و الله ما شبعت من سوالفج ..

احتد الموضوع اكثر و اكثر .. اصراري على الرده .. و اصراره على اليلسه وياه .. كان السبب ..
صار كلام ماله داعي بيني و بينه .. صار يعلي صوته .. و عليت صوتي ..
سبني .. بابشع السب اللي يخطر في بالكم .. جرحني .. حسيت عمري صغيره في عيونه .. حسيت اني كسيره .. حسيت انه يكسر قلبي ..
كلامه كان مثل السجاجين .. حطم كرامتي .. ما توقعته يقولي هالرمسه ..
و اصريت اني ارد البيت .. غصب عنه .. مب برضاه .. عصب علي ..
ركن السياره على في نص الطريج .. على الرصيف .. و نزل .. بطل الباب ..
قالي ::
انزلي ..
سلامه ::
انزل وين ؟؟
عبد الله ::
نزلي سيري بيتكم ..
سلامه ::
انت وصلني ..
عبد الله ::
و الله ما اوصلج ..
سلامه ::
عبد الله .. شو تقول ؟؟
...
مسكني من ايدي .. و سحبني .. و حسيته يسحب روحي من صدري .. مسكت ايده كانت قويه .. لو شد علي شويه يمكن يكسر ايدي ..
كنت احسبه تمثيليه منه .. إلا أنه كان حازم .. ومعصب .. و شديد معاي .. و بعده بعده كان يسبني و يسبني .. و مخلى فيني شيء .. جرحني تجريح .. و قطع قلبي معاه .. حسيته يكسر عظامي مب بس قلبي ..
مسكني من ايدي بقوة .. و فرني على الرصيف .. و مس شنطتي و فرها علي .. سمعت دبغة الباب ..
و ركب السيارة و شوح في ويهي ..
و راااااااح !!
ما استوعبت اللي صار .. كان مثل التحطيم .. مثل التكسير .. مثل طعون سجين في صدر .. حسيت اني اتحطم .. قلبي يتكسر .. ازقره .. عبد الله !! عبدالله .. اركض و را السيارة .. بس وييين الحق و وين .. ..
!؟!
شو اللي قاعد يصير ؟؟
دقيت له .. ما يرد .. او يسكر في ويهي ..
اترجاه في البريد الصوتي يرد علي .. بس ما شي امل ..
عبد الله .. حبيبي .. عمري .. قلبي .. روحي .. كل شيء .. وينك.. رد علي .. لا تخليني .. احبك و الله احبك ..
انخشيت و را الشير ..
الشارع فاضي .. بس خفت ان حد يشوفني .. خفت .. حسيت بالوحده .. عبد الله رد علي .. دخيلك .. رد ..
صحت .. و صحت .. و صحت .. و الف مره .. ادق .. و يسكر في ويهي .. رد علي عبد الله .. دخيلك .. رد علي ..
اطرش مسجات .. لين ما فضى تلفوني ..
؟!!!!!!!!!!!!!!!!!!!!!!!!!!!!
شو اسوي ؟؟ ما عرفت شو اسوي .. ادق حق منو ؟؟ رصيدي فضى ..
شو اسوي ..
مشيت قد ما اقدر .. ما اندل وين بيتنا ؟؟
شدراني هو بهذا الطريج و لا هذا ؟؟
ما اعرف .. مب حافضه الطريج ..
و لا اعرف وين انا قاعده امشي ..
وقفت عدالي سيارة .. سودا نيسان ..
تحرشوا فيني الشباب ..اللي يرقم .. و اللي نزل لي .. صارخت .. و انخشيت بين الشير .. وين اسير .. صارخت .. و صارخت .. عالمي صار اسود .. شو اسوي .. نزل الأول و الثاني و الثالث .. و مسكوني .. و سبوني .. وما خلوا في شي .. اللي يمط عني الشيلة .. و اللي شل شنطتي و فرها في السيارة .. و انا اصيح .. اصارخ .. اصيح و اصارخ .. محد يسمعني .. اضرب هذا و لا هذاك ؟؟
يا الله .. ساعدني .. ساعدني .. ساعدني ..
سحبوني لين السيارة .. و دخلوني فيها ..
و إذا كنت خسرت ويا عبد الله .. عذريتي ..
وياهم خسرت حياتي ..
ضرب و ضربوني .. و ما خلوا فيني شي ..
حتى تلفوني و خذوه .. شوهوني من الضرب .. كسرولي اصبوعي ..
حطموا لي قلبي ..
و عبد الله وينك يا عبد الله .. وينك يا حبيبي .. وينك يا روحي .. تعال دافع عني .. تعال ..
...
وصلت الساعه ست الصبح .. سبع .. ثمان .. تسع .. و بعدها ..
فروني فنص الصحرا .. نص السيوح ..
ما اعرف شو اسوي ..
فروا علي شنطتي .. و غرشة ماي .. و دكوني بالرمل و غابوا ..
حر .. تعب .. هلكت ..
ما اروم انش .. و لا اقدر .. احرك ريلي .. شربت ماي .. و شربت .. لين ما خلصت الغرشة ..
وكلي امل ان عبد الله يرجع يشلني .. ما اعرف الساعه كم .. بس الحر ذابحني .. بموووت من الحر ..
مشيت من غافة لغافة .. انخش عن الحر ..
حتى عزبه ما اشوفها .. اطالع يميني و يساري ..كل شي اصفر .. و سحاب منتشر .. اخضر"شجر الغاف" ..
ما على جسمي غير كشختي اللي كشختها حق عبد الله .. لا شيلة و لا عباه .. و شنطتي فريتها .. لانها صارت لي ثجيلة ..
تعبت .. تعبت .. تعبت ..
ما اقدر امشي اكثر .. الرمله حاره .. حرقتني .. ما اقدر امشي عليها .. خاصه و اني فريت الجوتي .. ما اقدر امشي فيه في الرمله ..
فصخت قميصي .. و تغطيت عن الحر ..
مشيت .. و مشيت .. أكثر و أكثر ..
تعبت ..
خلاص .. خلاص .. هلكت .. يلست تحت غافه ..
ادعي الله .. يساعدني ..
و ازقر عبد الله يشلني ..
ما من مجيب .. حسيت ان هلاكي .. بدأ .. و العد التنازلي للصفر من حياتي .. بدأ ..
خلاااص .. سلامه .. هذي نهايتج .. تموتين تحت الحر ..
من الخوف ..و التعب .. و الإرهاق ..
رقدت .. تحت براد الغافة ..
إلا أني نشيت .. عطشانه .. ابا اشرب ماااي ..
مااااااااااااااااااااااااااااي ..
صحت .. اطالع يميني .. مثل يساري ..
ماشي فرق بين هذا و ذاك .. كل المكـــان اصفر ...
صحت .. بس من دون دموع .. نشف حلجي .. نشفت دموعي .. خلاص .. خلص الماي في جسمي ..
نشفت ..
ما قمت اعرق .. خلاص .. بمــوت .. عرفت اني اموت .. فقدت الوعي ..
اغمى علي .. و لا حسيت بعمري ..
اكـــيد اني مت ..
وما اعرف شو صار لعبد الله .. و لا ادري .. حصلوني .. و لا لا ..
بس اللي عرفته ..
إن عبد الله .. جذاب .. ما يحب .. قلبه حجر ..
استغل حبي ..
و استغل خاطره الغالي علي ..
استغل كل شي فيني ..
ليتك يا عبد الله .. تعرف .. اني حبيتك .. و اموت فيك .. و اعشقك .. ليتك تعرف اني .. لين آخر نفس في صدري .. ذكرتك ..
و ليتك تعرف .. انك حطمت قلبي .. و بعدني احبك ..
و ليتك يا عبد الله ..
تعرف .. إني خسرت كل شيء ..
كل شيء ..
ما ادري الحين شو الناس بتقول عني ؟!؟!
و شو بتقول عن اهلي ؟!؟
ما ادري .. شو بيصير يوم القيامة ؟!؟!
الله عذبني هالعذاب .. عشان يخلصني من عذاب الآخرة ..؟؟
و لا هذا العذاب اللي سابق العذاب الأكبر ؟؟!؟!
ما ادري شو بيكون مصيري ..
و انت يا بوي .. لو راعيتني .. و خذت بخاطري .. و عطيتني الحب الذكوري اللي افقده .. كنت ما احتيت لأي حب ثاني ..
و انت يا امي .. لو انج وياي دايم الدوم .. ما كنت بعيش هالدوامه و انتي مب عارفه عني بشيء ..
و انت يالمجتمع .. لو تعرف اني ضحيه .. ما كنت بترمس عني .. و لا كنت بتقول فيني اللي بتقوله .. و لو كل بناتكم صار و ياها اللي صار .. كنت بتسكت ..
و انا .. شو اللي جرني للرذيله ؟؟؟ غير اني بعيده عن الله .. و بعيده عن القرآن .. و كل حياتي أغاني .. هذي النتيجه .. و تقولون ليش الأغاني حرام ؟؟ شو فيها ؟؟
الأغاني كانت السبب اللي خلاني اعشق .. و احب .. و اعبر فيها عن مشاعري .. و الأغاني هي اللي خلتني .. اقول احبك .. و اطلع مع عبد الله .. بحجة الحب ..
و انت يالمغني .. و المغنية .. إذا كان هذا مصيري بسبتك .. شو بيكون مصيرك انت يوم القيامه ..؟؟ ممكن تخبرني ؟؟ هل بتدخل الجنه .. لانك السبب في دخولي النار ؟؟
هااااااا..
ابا اعرف بس .. شووو اللي سويته عشانكم كلكم .. عشان .. تحطموني جذااا .. شووو ..
بس لاني .. انسانه .. تشل في قلبها الطيبه .. و المحبه .. و الحب ..
زرعتوه فيني .. زرع .. و بذرتوه فيني .. بذر ..
لعنة الله عليكم كلكم ..
و الله يغفر لي ..
آمــــين ..
...
...
...
قُلْ يَتَوَفَّاكُم مَّلَكُ الْمَوْتِ الَّذِي وُكِّلَ بِكُمْ ثُمَّ إِلَى رَبِّكُمْ تُرْجَعُونَ {11}‏ وَلَوْ تَرَى إِذِ الْمُجْرِمُونَ نَاكِسُو رُؤُوسِهِمْ عِندَ رَبِّهِمْ رَبَّنَا أَبْصَرْنَا وَسَمِعْنَا فَارْجِعْنَا نَعْمَلْ صَالِحاً إِنَّا مُوقِنُونَ {12} وَلَوْ شِئْنَا لَآتَيْنَا كُلَّ نَفْسٍ هُدَاهَا وَلَكِنْ حَقَّ الْقَوْلُ مِنِّي لَأَمْلَأَنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ {13} فَذُوقُوا بِمَا نَسِيتُمْ لِقَاء يَوْمِكُمْ هَذَا إِنَّا نَسِينَاكُمْ وَذُوقُوا عَذَابَ الْخُلْدِ بِمَا كُنتُمْ تَعْمَلُونَ {14} إِنَّمَا يُؤْمِنُ بِآيَاتِنَا الَّذِينَ إِذَا ذُكِّرُوا بِهَا خَرُّوا سُجَّداً وَسَبَّحُوا بِحَمْدِ رَبِّهِمْ وَهُمْ لَا يَسْتَكْبِرُونَ {15} {س} تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفاً وَطَمَعاً وَمِمَّا رَزَقْنَاهُمْ يُنفِقُونَ {16} فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاء بِمَا كَانُوا يَعْمَلُونَ {17} أَفَمَن كَانَ مُؤْمِناً كَمَن كَانَ فَاسِقاً لَّا يَسْتَوُونَ {18} أَمَّا الَّذِينَ آمَنُوا وَعَمِلُوا الصَّالِحَاتِ فَلَهُمْ جَنَّاتُ الْمَأْوَى نُزُلاً بِمَا كَانُوا يَعْمَلُونَ {19} وَأَمَّا الَّذِينَ فَسَقُوا فَمَأْوَاهُمُ النَّارُ كُلَّمَا أَرَادُوا أَن يَخْرُجُوا مِنْهَا أُعِيدُوا فِيهَا وَقِيلَ لَهُمْ ذُوقُوا عَذَابَ النَّارِ الَّذِي كُنتُم بِهِ تُكَذِّبُونَ {20}‏ وَلَنُذِيقَنَّهُمْ مِنَ الْعَذَابِ الْأَدْنَى دُونَ الْعَذَابِ الْأَكْبَرِ لَعَلَّهُمْ يَرْجِعُونَ {21} وَمَنْ أَظْلَمُ مِمَّن ذُكِّرَ بِآيَاتِ رَبِّهِ ثُمَّ أَعْرَضَ عَنْهَا إِنَّا مِنَ الْمُجْرِمِينَ مُنتَقِمُونَ {22}
سورة السجدة

بَلَى مَن كَسَبَ سَيِّئَةً وَأَحَاطَتْ بِهِ خَطِيـئَتُهُ فَأُوْلَـئِكَ أَصْحَابُ النَّارِ هُمْ فِيهَا خَالِدُونَ {81}
أُولَـئِكَ الَّذِينَ اشْتَرَوُاْ الضَّلاَلَةَ بِالْهُدَى وَالْعَذَابَ بِالْمَغْفِرَةِ فَمَا أَصْبَرَهُمْ عَلَى النَّارِ {175}
البقرة
وَمَن يَعْصِ اللّهَ وَرَسُولَهُ وَيَتَعَدَّ حُدُودَهُ يُدْخِلْهُ نَاراً خَالِداً فِيهَا وَلَهُ عَذَابٌ مُّهِينٌ {14}
سورة النساء

خســـــوف القمــــر